Bashkimi Evropian(BE) i ka dërguar një letër zyrtare Këshillit Prokurorial të Kosovës(KPK), duke shprehur shqetësime serioze për dështimin e tij për të funksionalizuar strukturat bazë organizative në mbledhjen konstituive të 20 janarit 2026.
Në letrën drejtuar ushtruesit të detyrës së Kryeprokurorit të Shtetit, Agron Qalaj, shefi i Zyrës së Bashkimi Evropian në Kosovë, Aivo Orav, thekson se dështimi është veçanërisht zhgënjyes, pasi përbërja e re e KPK-së ishte menduar të shënonte një hap kyç në procesin e reformës.
“Këshilli u pengua të marrë mandatin e tij dhe të fillojë punën siç ishte paraparë”, thuhet në letër.
BE-ja rikujton se ka mbështetur vazhdimisht reformën e KPK-së me synimin për të reduktuar korporatizmin dhe për të forcuar përputhjen e sistemit prokurorial me parimet e sundimit të ligjit. Në këtë kontekst, Orav nënvizon se janë shprehur vazhdimisht shqetësime për vendime “proceduralisht të parregullta dhe madje të paligjshme”, të cilat po minojnë zbatimin e reformës.
Në letër thuhet gjithashtu se qasja e diskutueshme ndaj qeverisjes demokratike të KPK-së “e ka dobësuar legjitimitetin e Këshillit” dhe ka vënë në pikëpyetje besueshmërinë e tij.
BE-ja i bën thirrje udhëheqjes së KPK-së që të marrë masa urgjente për funksionim të rregullt, duke respektuar ligjin, transparencën dhe procedurat e drejta.
“Forma e angazhimit tonë do të varet nga kredibiliteti i Këshillit dhe përkushtimi i tij ndaj qeverisjes së ligjshme, transparente dhe të drejtë”, përfundon letra e BE-së.