Presidenti i Shqipërisë, Bajram Begaj e ka përshëndetur dorëzimin e aplikimit të Kosovës për t’u anëtarësuar në Bashkimin Evropian.
Begaj e konsideroi si një akt të rëndësishëm historik, ndërsa autoriteteve të Kosovës iu uroi shumë suksese në përmbushjen e detyrimeve të procesit të anëtarësimit.
“U bëj thirrje të gjitha vendeve anëtare që ta mbështesin aplikimin e Kosovës, pasi kjo do të ishte jo vetëm në interesin më të mirë gjeopolitik të Bashkimit Evropian, por dhe një kontribut më shumë në mbështetje të një vendi e një populli me vokacion të qartë evropian dhe euro-atlantik”, ka thënë ndër të tjera, Begaj.
“Urime Kosovë e shumë suksese!”, është shprehur Begaj.
Ndryshe, Kryeministri i Kosovës, Albin Kurti, gjatë së enjtes së 15 dhjetorit, i dorëzoi Presidencës Çeke të Këshillit të Bashkimit Evropian, aplikimin e Kosovës në Bashkimin Evropian.