Kryeministrja e Serbisë, Ana Bërnabiç ka deklaruar se është mjaft e shqetësuar për armatosjen e Forcës së Sigurisë së Kosovës (FSK).
Shqetësimet e saj për forcimin e FSK-së i lidh me moslejimin e mbajtjes së zgjedhjeve serbe në Kosovë.
”Kurti thotë se ne po armatosemi, ndërsa dikush tjetër po e armatos atë. Unë jam e shqetësuar se sa mbështetje ka pasur ai, që serbëve të mos u lejojë të drejtën themelore për të votuar, fillimisht, në referendum dhe pastaj në zgjedhje”, tha Bërnabiç.
Sipas saj, gjëra të tilla destabilizojnë të gjithë rajonin e Ballkanit Perëndimor.
Të shtunën e 16 prillit, mediat serbe kanë raportuar se Britania e Madhe është duke e furnizuar Kosovën me raketa anti-tank ”Javelin” dhe ”NLAW”.
Por, ky dyshim i pakonfirmuar nga autoritetet britanike dhe kosovare, duket se ka shqetësuar shumë Serbinë, e cila në anën tjetër po armatoset nga Kina.
Ndërkaq, ministri i Mbrojtjes, Armend Mehaj, ka thënë se ushtria është furnizuar e vazhdon të furnizohet me armatim dhe pajisje moderne, dhe kjo falë aleatëve tanë, në krye me Shtetet e Bashkuara të Amerikës.
