Pavarësisht se si do të jetë rezultati përfundimtar i zgjedhjeve të mesmandatit, presidenca e Joe Biden do të ketë ndryshime të thella.
Shtëpia e Bardhë njoftoi se presidenti Biden do të mbante një konferencë shtypi pasditen e së mërkurës për të folur mbi rezultatet.
Presidenti i SHBA-ve, Joe Biden, në një konferencë për media teksa ka folur për rezultatet e zgjedhjeve, ka shprehur një optimizëm duke u thënë zyrtarëve demokratë se “ne do t’i befasojmë të gjithë”.
Siç raporton VOA, pas dyerve të mbyllura, ndihmësit e Shtëpisë së Bardhë kanë hartuar plane në rast se republikanët marrin kontrollin e njërës apo të të dyja dhomave të Kongresit, një skenar që Biden e ka pranuar që do ta vështirësonte punën e tij.
Ende është e paqartë se kush do të marrë kontrollin e Dhomës së Përfaqësuesve, pasi fitoret në disa gara treguan për forcën befasuese të demokratëve.
Javën e kaluar presidenti u kishte bërë thirrje amerikanëve që të jenë të durueshëm ndërsa numërohen votat dhe të shmangin përfshirjen në teori konspirative.
Nëse republikanët fitojnë kontrollin e Kongresit, aleatët e Biden po përgatiten për beteja të ashpra politike, që nga buxheti, detyrimet financiare, mbështetja për Ukrainën e deri tek përparësitë legjislative.
Fitorja e republikanëve mund të sjellë në Kongres një mori kandidatësh të cilët Biden i ka cilësuar si kërcënim për demokracinë.
Kjo do të kufizonte mundësitë e bashkëpunimit duke sjellë sfida të reja para zgjedhjeve presidenciale të vitit 2024.
Në zgjedhjet e mesmandatit të presidencës së zotit Trump në vitin 2018, republikanët humbën 40 vende në Dhomën e Përfaqësuesve por fituan dy vende në Senat.