Administrata Biden pritet të njoftojë të mërkurën një ndihmë ushtarake shtesë prej 1 miliard dollarësh për Ukrainën, sipas një zyrtari amerikan, raporton CNN.
Paketa pritet të përfshijë dërgesa shtesë të municioneve dhe sistemeve të mbrojtjes bregdetare.
Duke folur në Bruksel, Sekretari i Mbrojtjes, Lloyd Austin, tha se SHBA-ja dhe Ukraina “po punojmë për të përmbushur kërkesat e Ukrainës për aftësi të reja, veçanërisht nevojën e saj për raketa me rreze të gjatë, forca të blinduara dhe mbrojtje bregdetare”.
Paketa e fundit e armëve vjen gjersa ushtria e Ukrainës po djeg municionet e saj të epokës sovjetike. Ndërsa zyrtarët ukrainas i janë lutur Perëndimit të dërgojë armatim të rëndë shtesë përderisa lufta me Rusinë po vazhdon.
Zyrtarët e inteligjencës perëndimore dhe ushtarake besojnë se lufta është në një fazë kritike që mund të përcaktojë rezultatin afatgjatë të konfliktit, ndërsa Rusia ka grumbulluar një avantazh të rëndësishëm artilerie rreth dy qyteteve kryesore në Ukrainën lindore.
Presidenti Joe Biden dhe presidenti ukrainas, Vlodymyr Zelensky, kanë pasur një bisedë telefonike të mërkurën, përpara një njoftimi për një miliard dollarë ndihmë për sigurinë dhe gjithashtu edhe për ndihmat tjera humanitare për Ukrainën.
Biden ka informuar homologun e tij ukrainas se “po ofrojnë një tjetër miliard dollarë ndihmë sigurie për Ukrainën, duke përfshirë artileri shtesë dhe armë të mbrojtjes bregdetare, si dhe municione për artilerinë dhe sistemet e avancuara të raketave që ukrainasve u duhen për të mbështetur operacionet e tyre mbrojtëse në Donbas”.
“Ne diskutuam gjithashtu përpjekjet e Sekretarit Austin në Bruksel sot, për të koordinuar mbështetjen shtesë ndërkombëtare për forcat e armatosura të Ukrainës” tha Presidenti amerikan Joe Biden.