Protesta e serbëve në Jarinjë, sipas zëvendëskryeministrit të parë të Qeverisë së Kosovës, Besnik Bislimi, ka qenë plan “ruso-serb, që dje të digjej pika kufitare e Jarinjës”.
Në një reagim, Bislimi tha se “intensiteti i sulmeve hibride të Serbisë dhe Rusisë ndaj Republikës së Kosovës është rritur ndjeshëm”.
Megjithatë, sipas tij, ky plan i Serbisë dhe Rusisë u parandalua nga institucionet e Kosovës, në bashkëpunim me aleatët perëndimorë, duke e veçuar ShBA-në.
“Ky plan u parandalua nga institucionet e Republikës së Kosovës (veçmas mekanizmat e sigurisë), në bashkëpunim me partnerët perëndimorë (veçmas amerikanët). Pavarësisht se policia e Serbisë, dje u shfaq duke i ndaluar huliganët që mos ta djegin Jarinjën, ky quhet vetëm një akt tërheqjeje nga ana serbe, duke e parë se një gjë e tillë do t’iu dështonte”, ka deklaruar Bislimi.
Tutje, ai ka theksuar orientimin properëndimor të Kosovës, teksa po ashtu e ka vënë theksin edhe tek aleanca e Serbisë me Rusinë dhe Kinën.
“Ata përfaqësojnë agresionin, ne përfaqësojmë lirinë!”, ka shkruar Bislimi.
Grupi i serbëve që protestuan, me plan për të sulmuar pikën kufitare në Jarinjë
Një ditë më parë, RTV Dukagjini, kishte raportuar se grupi i serbëve që protestuan, kishin plan ta sulmonin pikën kufitare në Jarinjë.
Një gjë të tillë e kanë pohuar për Radio Televizionin Dukagjini, burime brenda organeve të sigurisë.
Ndërkaq, në dijeni për një plan të tillë kishte edhe misioni i KFOR-it në Kosovë. Kjo është edhe arsyeja se pse ky mision i ka dyfishuar forcat në pikën kufitare në Jarinjë dhe kanë vendosur tela gjemborë.
Planin për ta sulmuar pikën kufitare është bërë nga një grup ekstremist serb, të cilin e prin Damjan Knezevic, një serb që ka lidhje të afërta me grupin “Ëagner”, një grup ushtarak rus në pronësi të Yevgeny Prigozhin, njeri i afërt i presidentit rus, Vladimir Putin.