Zëvendëskryeministri i parë për Integrim Evropian, Zhvillim dhe Dialog i Kosovës, Besnik Bislimi, ka pritur në takim ambasadorin e ri të Turqisë, Sabri Tunç Angili.
Në takimin e parë zyrtar me ambasadorin e ri turk, Bislimi i ka uruar mirëseardhje e suksese ambasadorit në detyrën e tij, duke i potencuar marrëdhëniet e shkëlqyera të bashkëpunimit mes Kosovës dhe Turqisë.
Siç njofton Zyra e Kryeministrit, ambasadori shprehu mirënjohjen e tij për mikpritjen në Kosovë dhe theksoi mirënjohjen e thellë për ndihmën dhe solidaritetin e Kosovës ndaj popullit turk në rastin e tërmetit të fuqishëm që goditi Turqinë.
Po ashtu, në këtë takim është diskutuar për mundësitë e thellimit të marrëdhënieve bilaterale, veçanërisht në ekonomi, ku ekziston potencial madhor në rritjen e bashkëpunimit mes dy vendeve tona.
Sipas njoftimit, Bislimi foli edhe për objektivat strategjike të Kosovës, siç janë anëtarësimi në Këshillin e Evropës, rrugëtimi drejt Bashkimit Evropian, përfundimi i procesit të liberalizimit të vizave dhe aplikimi në Partneritetin për Paqe në NATO.
Palët potencuan dhe rëndësinë e nevojën për stabilitet, paqe dhe siguri në rajonin e Ballkanit Perëndimor, si dhe biseduan edhe mbi procesin e dialogut.