Në një takim me ministrin e ri të Jashtëm turk, Hakan Fidan, në Londër, sekretari amerikan i Shtetit, Antony Blinken, ka inkurajuar Turqinë të mbështesë Suedinë në përpjekjet e saj për t’u bashkuar me NATO-n, kështu ka thënë një zëdhënës i Departamentit të Shtetit.
Turqia ka kundërshtuar deri tani ofertën e Suedisë për anëtarësim në aleancën ushtarake perëndimore, por anëtarët e NATO-s shpresojnë që ajo të bashkohet në një samit të korrikut në Vilnius.
Siç ka raportuar agjencia e lajmeve, Reuters, Blinken gjithashtu ka mirëpritur mbështetjen e Turqisë për Ukrainën dhe punën e saj në marrëveshjen e grurit, e cila lejon eksportet e Ukrainës nga portet e Detit të Zi.
Sekretari i Shtetit i ka kërkuar edhe më herët që Turqia të pranojë menjëherë anëtarësimin e Suedisë në NATO. Finlanda u bashkua me NATO-n në prill, ndërsa Turqia vazhdon të bllokojë pranimin e Suedisë.
Turqia ka argumentuar se Suedia strehon anëtarë të grupeve militante që i konsideron terroristë, ndërsa Suedia ka prezantuar një ligj të ri për të vështirësuar financimin dhe mbështetjen e grupimeve terroriste.
Ministri i Jashtëm suedez ka kërkuar që parlamenti turk të ratifikojë ofertën e Suedisë, duke u bazuar në një marrëveshje mes dy vendeve.
Blinken dhe ministri Fidan ishin në Londër për të marrë pjesë në një konferencë mbi Ukrainën, ku aleatët kanë premtuar ndihmë ekonomike dhe rindërtim për vendin. Fidan ka shprehur mbështetjen e Turqisë për Ukrainën gjatë konferencës.