Sekretari amerikan i Shtetit, Antony Blinken, zbarkoi në kryeqytetin ukrainas mëngjesin e sotëm.
Ai do të takohet sot me presidentin Volodymyr Zelensky dhe zyrtarë të tjerë. Gjatë këtij takimi ai pritet të japë një mesazh “sigurie të fortë” për ukrainasit.
Vizita e tij vjen ndërsa vendi përpiqet të frenojë një inkursion të madh rus pranë qytetit të tij të dytë më të madh, Kharkiv.
Ardhja e Blinkenit shënon gjithashtu tri javë që kur Kongresi amerikan më në fund ra dakord për një paketë të re ndihme prej 61 miliardë dollarësh për Ukrainën.
Antony Blinken nuk është i vetmi politikan perëndimor që ka vizituar Ukrainën ditët e fundit.
Sekretari i Jashtëm në hije i laburistëve, David Lammy dhe sekretari i mbrojtjes në hije, John Healey, ishin dje në Kiev për t’u takuar me shefin e zyrës së presidentit të Ukrainës, Andriy Yermak dhe ministrin e Mbrojtjes, Rustem Umerov.
Sekretari amerikan i Shtetit, Antony Blinken, dhe presidenti ukrainas, Volodymyr Zelensky po takohen në Kiev, raporton BBC.
Udhëtimi i sotëm shënon herën e katërt që kryediplomati amerikan viziton Ukrainën që nga pushtimi i Rusisë në shkurt 2022.
Më herët, një zyrtar i lartë amerikan që udhëtonte me Blinkenin u tha gazetarëve se qëllimi i kësaj vizite “është të dërgojë një sinjal të fortë sigurie për ukrainasit, të cilët pa dyshim janë në një moment shumë të vështirë si me betejën e ashpër në frontin lindor, por edhe me rusët” tani duke zgjeruar disa sulme ndërkufitare në Kharkiv”.