Sekretari amerikan i Shtetit, Antony Blinken, i kërkoi ministrit të Jashtëm rus, Sergey Lavrov, që ta lirojë menjëherë një gazetar të gazetës “Wall Street Journal”, i cili u ndalua javën e kaluar, si dhe amerikanin Paul Whelan të burgosur që nga viti 2018.
Departamenti i Shtetit njofton se Blinken dhe ministri i Jashtëm rus, Sergej Lavrov, kanë zhvilluar një bisedë telefonike. Në këtë bisedë telefonike me minsitrin Lavrov, kryediplomati Blinken shprehu shqetësimin e thellë për ndalimin nga Kremlini të gazetarit Evan Gershkovich nën akuzat për spiunazh. Ai bëri thirrje për lirimin e tij të menjëhershëm.
Shtetasi amerikan, Paul Whelan, ka qenë drejtor për sigurinë globale në kompaninë “BorgWarner”, një furnizues amerikan i pjesëve të këmbimit për makinat. Ai u ndalua në Rusi në dhjetor të vitit 2018 nën akuza për spiunazh. Qeveria amerikane dhe familja e tij janë shprehur se akuzat janë të pabaza. Ai po vuan një dënim me 16 vjet burgim.
Kryediplomati Blinken dhe ministri i Jashtëm rus, Lavrov, po ashtu, diskutuan për krijimin e një mjedisi ku misionet diplomatike mund t’i kryejnë detyrat e tyre, sipas deklaratës së Departamentit të Shtetit.
Ministria e Jashtme ruse përmes një deklarate, ka thënë se kryediplomati Lavrov i theksoi homologut Blinken nevojën për t’i respektuar vendimet e autoriteteve ruse për rastin e gazetarit Gershkovich, për të cilin, Moska pretendon pa prova se “u kap në flagrancë”.
Gazeta “Wall Street Journal” ka mohuar me vendosmëri akuzat dhe ka kërkuar lirimin e gazetarit Gershkovich. Zyrtarët amerikanë i kanë bërë gjithashtu thirrje Rusisë që ta lirojnë atë, ndërsa presidenti Joe Biden u tha gazetarëve të premten se mesazhi i tij për Rusinë ishte “Lëreni të lirë”.
Departamenti i Shtetit e cilësoi si të papranueshëm ndalimin e gazetarit Gershkovich. VoA