Kryeministri i Shqipërisë, Edi Rama, ka bërë publike ftesën e pranuar dje nga presidenti amerikan, Donald Trump, , ku e fton Shqipërinë të bëhet shtet themelues në Bordin e Paqes, një nismë ndërkombëtare që synon forcimin e paqes në Lindjen e Mesme dhe zgjidhjen e konflikteve globale.
Rama thotë se me nder dhe kënaqësi e ka marrë letrën nga Presidenti amerikan, teksa e falënderon për besimin e dhënë dhe zotohet se do të bëjë gjithçka për të lartësuar emrin e Shqipërisë dhe dinjitetin e shqiptarëve, njofton Dukagjini.
“Si Kryetar i Bordit, ftoj zyrtarisht Republikën e Shqipërisë të përfaqësuar prej jush, të na bashkohet si Shtet Anëtar Themelues, dhe të bëhet palë në Statutin e Bordit të Paqes. Ky bord do të jetë aq i veçantë sa kurrë më parë nuk ka ezistuar diçka e ngjashme me të! Çdo Shtet Anëtar mund të caktojë një përfaqësues të autorizuar në emër të tij për të marrë pjesë dhe kontribuar në takime. Bashkëngjitur gjeni Planin Gjithëpërfshirës, dhe Statutin e Bordit, i cili tani është i disponueshëm për nënshkrimin tuaj dhe ratifikimin”, thuhet nga Trump në letër.