Përfaqësuesi i Lartë i Bashkimit Evropian, Josep Borrell, ka thënë se BE-ja, nuk do të tolerojë sulmet ndaj EULEX-it dhe përdorimin e akteve të dhunshme kriminale në veri.
Po ashtu, Borrell ka thënë se serbët duhet t’i heqin menjëherë barrikadat e vendosura në Rudarë në hyrje të Sveçanit.
“BE nuk do të tolerojë sulmet ndaj EULEX-it ose përdorimi i akteve të dhunshme kriminale në veri. Barrikadat duhet të hiqen menjëherë nga grupet e serbëve të Kosovës. Duhet të rivendoset qetësia. EULEX-i do të vazhdojë të koordinojë me autoritetet e Kosovës dhe KFOR-in. Të gjithë aktorët duhet të shmangin përshkallëzimin”, ka shkruar ai në rrjetin social Twitter.
Ndërsa, Ambasadori amerikan në Kosovë, Jeff Hvneier ka thënë se sulmet e dhunshme ndaj Policisë së Kosovës dhe EULEX-it janë të papranueshme dhe përgjegjësit duhet të mbajnë përgjegjësi përmes sistemit të drejtësisë kosovare.
Ai gjithashtu ka dënuar sulmin që i është bërë patrullës së EULEX-it me shok-bombë mbrëmjen e së shtunës në afërsi të Rudarës, ku janë vendosur barrikadat në veri të vendit.
Kujtojmë se, vendosja barrikadave në Rudarë erdhi në shenjë pakënaqësie për arrestimin e ish-pjesëtarit të Policisë së Kosovës, Dejan Pantiq nga radhët e komunitetit serb.
Si rrjedhojë, Policia e Kosovës mbylli rrugët që çojnë për në pikëkalimet kufitare Jarinjë dhe Bërnjak që lidhin Kosovën dhe Serbinë.