Mbretëria e Bashkuar po shqyrton mundësinë e sekuestrimit të një anijeje cisternë të “flotës në hije” të lidhur me Rusinë, në një hap përshkallëzues që mund të hapë një front të ri presioni ndaj Moskës.
Burime britanike të mbrojtjes i kanë thënë The Guardian se opsionet ushtarake për kapjen e një anijeje që vepron jashtë ligjit janë identifikuar në diskutime me aleatët e NATO-s, rreth një muaj pas sekuestrimit të një tankeri rus në Atlantik nga Shtetet e Bashkuara.
Sipas Lloyd’s List Intelligence, gjatë muajit janar 23 anije të flotës në hije, që përdorin flamuj të rremë ose mashtrues, janë vërejtur në Kanalin e Largët dhe në Detin Baltik. Shumica e tyre lidhen me eksportet e naftës ruse, kryesisht drejt Kinës, Indisë dhe Turqisë, përmes rrugëve detare.
Në fund të muajit të kaluar, Mbretëria e Bashkuar, Gjermania, Franca dhe vende të tjera të NATO-s me dalje në Detin Baltik dhe Detin e Veriut nënshkruan një deklaratë të përbashkët, duke theksuar se të gjitha anijet që lundrojnë në këto rajone duhet të respektojnë rreptësisht ligjin ndërkombëtar.
Megjithatë, pavarësisht vendosjes së këtij kuadri për një sekuestrim të mundshëm, deri tani nuk është ndërmarrë asnjë veprim konkret. Muajin e kaluar, Marina Mbretërore britanike zhvilloi gjithashtu një takim informues me deputetët, ku u diskutuan kërcënimet që vijnë nga Rusia, si dhe situata e sigurisë në Arktik dhe veriun e largët raporton Dukagjini.