Përbërësit:
1 pako petë të gatshme
4-5 patëllxhanë
1 spec jeshil
1 spec i kuq
2 qepë mesatare
1 domate
1 tufë majdanoz
4-5 lugë vaj ulliri
1 limon (lëngu)
2 kokrra vezë
200 gr djathë
Kripë, piper i zi
Përgatitja:
Fillimisht pastroni patëllxhanët nga lëkura dhe prisni në rende. Më pas i vini patëllxhanët e grirë në një tas dhe i vini pak kripë dhe lëng limoni dhe i lini që të lëshojnë lëngun e tyre përreth 30 minuta.
Ndërkohë, në një tigan me bazë të gjerë fërgoni qepët e grira me vaj ulliri, sapo qepa të jetë fërguar shtoni specat e grirë dhe i fërgoni bashkë për 2 minuta. Më pas ia shtoni gjysmë gote me ujë të ngrohtë dhe i lini të zihen për 3-4 minuta derisa të zbuten.
Pastaj shtoni domaten e grirë në rende dhe pak vaj ulliri dhe e lini salcën edhe për 5 minuta në zjarr. Vendosni patëllxhanët në një kulluese për t’ua larguar lëngun që kanë lëshuar dhe më pas i shtoni te salca e përgatitur. Rregullojeni shijen me kripë dhe piper dhe e lini mbushjen e byrekut të gatuhet për 7-8 minuta në zjarr mesatar duke e trazuar herë pas here.
Në fund, shtoni majdanozin e grirë hollë, e largoni tiganin nga zjarri dhe e lini të ftohet plotësisht.
Pasi masa e përgatitur për mbushjen e byrekut të jetë ftohur, shtojmë vezët e rrahura mirë bashkë me djathin e thërrmuar.
Lyejmë një tepsi mirë me vaj ulliri dhe shtrojmë tri petat e para duke u hedhur secilës nga pak vaj ulliri. Më pas shtrojmë pjesën e parë të mbushjes. Vijojmë me shtrimin e dy petave të tjera, mbushje, petë, mbushje, petë. E vendosim byrekun të piqet në furrë në temperaturën 180 gradë për 25-30 minuta.