Kryediplomati britanik, David Cameron, ka qenë shumë i qartë sa i përket sulmit terrorist të 24 shtatorit në Banjskë të Zveçanit.
Duke theksuar rëndësinë e parandalimit të një sulmi tjetër terrorist, Cameron ka shtuar se “ta luftojmë nëse ndodh përsëri” dhe se Kosova është vend i pavarur që dëshiron stabilitet e siguri.
“Çfarë ka ndodhur këtu në shtator është ekstremisht shqetësuese dhe ne duhet të bëjmë çdo gjë që të mundemi që ta parandalojmë atë që të mos përsëritet dhe ta luftojmë nëse ndodh përsëri. Kosova është shtet sovran i pavarur që dëshiron stabilitet, siguri dhe të ardhme dhe Britania po ndihmon me të gjitha këto dhe është e drejtë që ne e bëjmë”, ka thënë Cameron.
Kryediplomati britanik e ka cilësuar interes kombëtar të Britanisë së Madhe sigurinë në Ballkan.
“Stabiliteti në Ballkan dhe siguria në Ballkan, dhe ndalimi i atyre që dëshirojnë të shkaktojnë destabilitet dhe të krijojnë probleme është në interesin direkt kombëtar të Britanisë dhe prandaj jam këtu, për t’i falënderuar trupat tona për punën që bëjnë dhe për të punuar me Qeverinë e Kosovës për t’i ndihmua ata me agjendën e tyre, duke njohur faktin se ata janë një shtet sovran që meritojnë mbështetjen tonë derisa ata përpiqen për siguri dhe sukses”, ka thënë Cameron për “Reuters”, teksa po vizitonte ushtarët britanikë të KFOR-it në Kosovë.