ETIAS apo ndryshe “Sistemi Evropian i Informacionit dhe Autorizimit të Udhëtimit” është një program i krijuar nga Bashkimi Evropian me qëllim të mbrojtjes dhe forcimit të kufinjëve të tij.
Qëllimi kryesor i ETIAS është që të identifikojë kërcënimet ose rreziqet e mundshme që lidhen me vizitorët që udhëtojnë në cilindo nga vendet e zonës Shengen. Autorizimi i këtij programi do të jetë i nevojshëm për të hyrë në një vend anëtar të Shengenit nga ajri, toka ose deti.
Këshilli i Bashkimit Evropian ka propozuar që procesi i liberalizimit të vizave për Kosovën të lidhet me funksionalizimin e këtij sistemi. Një kërkesë e tillë erdhi nga Franca dhe e njëjta u mbështet edhe nga Belgjika, Suedia, Holanda dhe Spanja.
Komisioni Evropian ka rekomanduar liberalizimin e vizave për Kosovën më 2018 ndërsa më 12 tetor të këtij viti, ky Komision ka konfirmuar në Raportin vjetor të Progresit se i njëjti mbështet rekomandimin e bërë për heqjen e vizave për Kosovën dhe konstatimi se shteti i ka përmbushur të gjitha kriteret.