Një monument që u quajt New Born (i porsalinduri), u bë simboli i shtetit më të ri në botë në vitin 2008. Prej vitit 2013, ky monument ngjyroset çdo vit në përvjetorin e shpalljes së pavarësisë me ngjyra e vizatime që përçojnë mesazhe të ndryshme për vendin.
Në 15-vjetorin, krijuesi i monumentit të pavarësisë së Kosovës, Fisnik Ismaili, ka treguar mesazhin e veçantë pas saj.
Ai për RTV Dukagjinin ka thënë se këtë vit nga presioni që Asociacioni i Komunave me Shumicë Serbe të krijohet, e që kjo sipas tij, nuk është dëshirë e asnjë shqiptari në Kosovë, për këtë, si një lloj proteste, monumenti u rindërtua për të dhënë një mesazh dhe për t’i treguar botës se një Republikë e copëtuar nuk duhet të krijohet.
“Si çdo vit New Borni gjithmonë e ka përçuar një porosi nga Kosova në botë. Për shembull, me na i liberalizu vizat, mos me na ndërtu mure, për ambientin. Sivjet duke qenë se Asociacioni tash po bëhet shumë presion me u kriju, dhe nuk e njoh një shqiptar që e do këtë. Kështu që ne, edhe si protestë, edhe si mesazh po i themi botës mos e krijoni edhe një Republikë të copëtuar”, është shprehur Ismaili.
Po ashtu, ai ka thënë se nga ky monument i 15-vjetorit të pavarësisë, në të njëjtën kohë, është edhe si mesazh për situatën në Ukrainë që akoma po vazhdon të copëtohet.
Pas zbulimit më 17 shkurt 2008, “Newborn” shpejt u bë simbol i Kosovës. Ajo u shfaq në faqen e parë të “The New York Times” të nesërmen. Ndërsa, në vitin 2012, Rita Ora, ylli i popit kërceu mbi të në një videoklip të këngës së saj.
Plani fillestar i Ismailit për “Newborn” ishte ruajtja e tij me mbishkrimet që nga nata kur u zbulua. Por, njerëzit vazhduan të nënshkruanin, kështu që u vendos që ai ta rilyejë atë çdo vit në përvjetorin e shpalljes së pavarësisë, duke filluar nga pikturimi i flamujve të vendeve që e kishin njohur Kosovën si një komb sovran.
Skulptura mbeti e pandryshuar për pesë vjet, për tu ndryshuar më pas secilin vit në ngjyrën, dizajnin dhe mesazhin nga vetë ideatori Ismajli me epikën vullnetare.
Shpenzimet mbulohen nga vetë kreatori, dhe konfirmimin për strukturën e re e jep Muzeu kombëtar i Kosovës.