Një cisternë nafte e mbushur plot është sulmuar dhe është përfshirë nga zjarri në brigjet e Dubait, pasi u godit, sipas autoriteteve lokale.
Më vonë u tha se ekipet e emergjencës arritën ta vënë situatën nën kontroll, pa rrjedhje nafte dhe pa të lënduar.
Cisterna thuhet se ishte me flamur të Kuvajtit, “Al-Salmi”, dhe u godit nga një “predhë e panjohur” pranë brigjeve të Dubait në Emiratet e Bashkuara Arabe, sipas kompanisë së inteligjencës detare Vanguard.
Sipas të njëjtit burim, zjarri në bord është vënë nën kontroll, të gjithë anëtarët e ekuipazhit janë të sigurt dhe nuk është raportuar ndonjë ndikim mjedisor.
Autoritetet e Dubait kanë konfirmuar incidentin dhe gjendjen, por nuk e kanë përmendur emrin e anijes.
Tankeri “Al-Salmi”, i ndërtuar në vitin 2011 dhe në pronësi të kompanisë shtetërore Kuwait Oil Tanker Company, raportohet se po transporton rreth 1.2 milionë fuçi naftë saudite dhe 800 mijë fuçi naftë kuvajtiane, sipas të dhënave të TankerTrackers.com.
Sipas platformave të gjurmimit të anijeve, ai ishte nisur drejt Qingdao në Kinë.
Presidenti amerikan Donald Trump ka paralajmëruar se SHBA do të “shkatërrojë” centralet energjetike dhe puset e naftës së Iranit nëse nuk hapet Ngushtica e Hormuzit.
Ndërkohë, ushtria izraelite ka njoftuar se katër ushtarë janë vrarë gjatë luftimeve në jug të Libanit, ku forcat e saj po përballen me Hezbollahun e mbështetur nga Irani.
Në një zhvillim tjetër, dy anije gjigante kineze me kontejnerë kanë kaluar Ngushticën e Hormuzit në përpjekjen e dytë për të dalë nga Gjiri Persik, sipas të dhënave të ndjekjes së anijeve. Sipas raportimeve, ky kalim shihet si sinjal i një afrimi diplomatik mes Pekinit dhe Teheranit, ndërsa Irani ka zgjeruar listën e vendeve të lejuara për kalim në këtë rrugë strategjike.
Ministria e Jashtme e Indonezisë ka kërkuar mbledhje urgjente të Këshillit të Sigurimit të OKB-së dhe hetim të plotë, pas vrasjes së tre paqeruajtësve të OKB-së nga Indonezia në jug të Libanit, të cilën e ka cilësuar si “sulm të rëndë”.
Po ashtu, në Teheran janë dëgjuar shpërthime dhe disa zona të kryeqytetit kanë mbetur pa energji elektrike, sipas mediave iraniane.
Izraeli ka kryer më herët sulme raketore duke thënë se ka goditur infrastrukturë ushtarake në Teheran dhe objektiva të Hezbollahut në Bejrut.