Nënkryetarja e Partisë Demokratke të Kosovës (PDK), Vlora Çitaku, ishte befasuar kur e kishte parë në lajme një fotografi të Ambasadorit Mehdi Halimit, duke votuar në zgjedhjet presidenciale të Francës.
Ajo kishte menduar se është Fake News, por pasi e kishte parë në llogarinë e tij në Facebook, thirrjen e ambasadorit për votim, e ka quajtur “Jodiplomatike dhe joprofesionale”, përmes një reagimi në llogarinë e saj në Facebook.
Çitaku ka thënë se dyshtetësia lejohet edhe në Kosovë edhe në Francë me Kushtetutë, por Ambasadori i Kosovës në Francë ka mision që ta përfaqësojë Kosovën, e jo të marrë pjesë në politikën e brendshme të shtetit, ku gjendet me mision diplomatik.
“Ambasadori ynë në Paris përfaqëson Republikën e Kosovës e jo shoqatë kulturore, dhe nuk ka asnjë lloj sensi që në mënyrë selektive t’i ndërrojë kapelat, një ditë qytetar i Francës, ditën tjetër Ambasador Fuqiplotë i Republikës së Kosovës”, ka shkruar ish- ambasadorja Çitaku.