Sjellje fëmijërore e të papërgjegjshme e ka cilësuar nënkryetarja e PDK-së, Vlora Çitaku, vendimin e kryeministrit të Kosovës për të mos shkuar në drekën joformale të thirrur nga kryeministri i Shqipërisë, Edi Rama, në Tiranë, ku do të marrin pjesë edhe kryeministrat e tjerë të Ballkanit Perëndimor.
Çitaku shtroi pyetje retorike për Kurtin “Si qenka më me rëndësi një konferencë në ishujt e bukur të Greqisë sesa takimi me liderët e rajonit dhe Komisionin Evropian në Tiranë?!”.
Kjo për shkak se kryeministri Kurti do të udhëtojë për në Kretë të Greqisë, në datën e njëjtë (sot) kur edhe do të mbahet dreka joformale e thirrur nga Rama.
Çitaku tha se Kurti nuk duhet të bëjë veprime personale ndaj Ramës.
“Kryeministër Edi Rama nuk të ka ftuar në dasmë familjare, por në takim me liderët e rajonit, në kuadër të procesit të Berlinit. Në takime të tilla mospjesëmarrja juaj nuk është më refuzim personal i juaji karshi Ramës. Nuk ka asgjë personale këtu”, tha ajo.
Sipas Çitakut, Kurti po tregon mosdurim dhe “qasje idhnake ndaj kryeministrit të Shqipërisë, e cila sipas saj “po e dëmton Kosovën”.
Një takim joformal i udhëheqësve të Ballkanit Perëndimor do të zhvillohet këtë të hënë në Tiranë.
I pranishëm në këtë mbledhje pritet të jetë edhe komisionari i Bashkimit Evropian për Fqinjësi dhe Zgjerim, Oliver Varheyli.
Ky takim do të shërbejë si përgatitje për samitin e Procesit të Berlinit, që do të mbahet në kryeqytetin e Shqipërisë më 16 tetor.
Kryeministri i Shqipërisë, Edi Rama, vendi i të cilit sivjet kryeson Procesin e Berlinit, ka paralajmëruar takimin joformal gjatë turneut të tij nëpër shtetet e Ballkanit Perëndimor, pak ditë më parë.
Ky takim është thënë se ka për qëllim diskutimin dhe koordinimin për të hartuar kërkesa të përbashkëta, për t’i paraqitur në samitin e tetorit, ku pritet të marrin pjesë udhëheqës të vendeve të Bashkimit Evropian.