Nënkryetarja e Partisë Demokratike të Kosovës, Vlora Çitaku, ka reaguar pas deklaratave të kryeministrit të Kosovës, Albin Kurti, se ka pranuar planin franko-gjerman. Sipas Çitakut, nuk mund të duket se e ka pranuar Kosova, pa e pranuar edhe Kuvendi i Kosovës.
“Ne e kemi pranuar propozimin paska thënë kryeministri. Ne, ndoshta po mendon për veten dhe për Bislimin. Kosova e pranon pasi ta ketë votuar në Parlament”, ka shkruar Çitaku.
Më tej, Çitaku ka kërkuar që kryeministri Kurti të sqarojë në Parlament, se a e përmban marrëveshja njohjen reciproke dhe a do të respektohet vendimi i Gjykatës Kushtetuese për Asocacionin.
“Ndërkohë, kryeministri të vijë në Kuvend dhe të sqarojë se a e përmban marrëveshja njohjen reciproke dhe a do të respektohet vendimi i Gjykatës Kushtetuese për themelimin e Asocacionit ”, ka theksuar ajo, duke u refuzuar që të flasë për gjashtë kushtet e kryeministrit Kurti.