Deputetja nga radhët e Partisë Demokratike të Kosovës, Blerta Deliu, e ka akuzuar zëvendëskryeministrin e parë, Besnik Bislimi, për qasje propagandistike, pasi ky i fundit në fjalën e tij gjatë seancës ku po diskutohet për Raportin e Progresit, ka thënë se i njëjti ka folur për 60 mijë vende të punës.
Deliu thotë në raport nuk ceket asnjëherë kjo çështje.
“Bislimi më shumë foli për propagandë qeveritare sesa iu referua raportit të fundit të vendit të cilin e kemi shqyrtuar tash e sa kohë. Ishte një qasje propagandistike, sepse askund raporti nuk flet për 60 mijë vende të punës, nuk e cek se s’ka asnjë citim në raport që iu referohet 60 mijë vendeve të punës, ndërkohë që gjendja sa i përket legjislacionit, kritikat kryesore janë në përshpejtimin me ligjet që vijnë me procedura të përshpejtuara, me qasjen arrogante të kësaj qeverie, në mungesën e kuorumit..”, tha ajo.
Deliu pati një kërkesë edhe për kryeministrin e Kosovës, Albin Kurti, i cili është edhe prezent në seancë.
“I nderuar kryeministër, kam një lutje për rastet e dhunës e vrasjet e trishta… ju lutem kryeministër dilni në mbështetje Policisë së Kosovës, bëni një task-forcë për t’i ndaluar këto raste të dhunës që po i shohim çdo ditë, vrasjet, vetëvrasjet, grabitjet janë fenomene që kanë goditur rëndë shoqërinë tonë”, tha ajo.