Ambasadori i Gjermanisë në Kosovë, Jorn Rohde, komentoi dështimin e 19-të radhazi për zgjedhjen e kryetarit të Kuvendit të Kosovës.
Ai tha se kjo situatë nuk është e mirë për Kosovën dhe reputacionin e saj ndërkombëtar.
“Përzgjedhja e kryetarit të Kuvendit në një vend demokratik është një veprim shumë i rëndësishëm dhe ne dëshironim që të funksiononte, por fatkeqësisht nuk ndodhi kështu. Tani jemi në raundin e 19-të”, deklaroi Rohde në Klan Kosova.
Ambasadori shtoi se, sipas tij, kjo situatë përbën një rekord të keq botëror, pasi asnjë vend nuk ka dështuar kaq herë në zgjedhjen e kryetarit të Kuvendit.