Është i akuzuar si i përfshirë në rastin e dhunimit të 11-vjeçares në Prishtinë. Mirëpo, Ekrem Rexhepi duket i qetë të premten, kur ndaj tij dhe Shkëlqim Kamerit nisi gjykimi.
Në seancën e parë, ata nuk janë deklaruar rreth fajësisë.
Për shkak se në këtë rast është e përfshirë një e mitur, gjyqtari Adnan Isufi e ka ndaluar xhirimin për mediat.
Këtë vendim, Isufi e mori pasi fillimisht dëgjoi prokuroren dhe mbrojtjen.
Prapa dyerve të mbyllura, gjyqtari Isufi ka vendosur që ta shtyjë seancën për një ditë tjetër, pasi i ka kërkuar Prokurores së Shtetit që t’i eliminoj disa paqartësi.
Në këtë rast, të akuzuar janë edhe tre persona të tjerë të mitur. Rasti ndaj tyre është veçuar.
Në aktakuzën e Prokurorisë theksohet se një pjesë e ngjarjes së rëndë ndodhi në një park në lagjen Arbëria në Prishtinë, përderisa ajo ishte dhunuar edhe në afërsi të shtëpisë saj.
Një rast të ngjashëm dhunimi, 11 vjeçarja e kishte përjetuar edhe në muajin qershor.
Të dyshuar në këtë rast janë gjashtë persona të tjerë.
Si shkak i këtij rasti, Samedin Mehmeti kishte dhënë dorëheqje nga pozita e Drejtorit të Përgjithshëm në Policinë e Kosovës, përderisa nga puna ishin larguar edhe disa persona të tjerë.