Seminari Rose-Roth shënon ditën e dytë të punimeve të tij, ditë në të cilën pritet të adresohet kryeministri i Kosovës, Albin Kurti.
Përgjatë të shtunës dhe njëherit, ditës së parë të këtij seminari, morën pjesë presidentja e Kosovës, Vjosa Osmani dhe kryetari i Kuvendit të Kosovës, Glauk Konjufca. Ndërkaq, seminari u hap nga kryesuesi i delegacionit të Kuvendit të Kosovës në Asamblenë Parlamentare të NATO-s, Driton Hyseni.
Presidentja e Kosovës, Vjosa Osmani-Sadriu, kërkoi mbështetjen e vendeve ndërkombëtare për anëtarësimin e Kosovës në NATO, në mënyrë që Kosova të arrijë të bëhet pjesë e Partneritetit për Paqe.
“Kosova është anëtare e familjes euroatlantike, e përkushtuar për partneritet dhe aleancë. Kjo është ajo pse pavarësisht ku shkoj dhe me kë takohem si presidente e Kosovës, ndajmë të njëjtat shqetësime dhe të njëjtat konkulizone”, kishte deklaruar Osmani gjersa theksoi “Serbia ka qenë në projekte të përbashkëta me NATO-n derisa e refuzon anëtarësimin në NATO. Përafrimi i saj me Rusinë flet shumë. Ne nuk jemi ende pjesë e Partneritetit për Paqe, Kosova është e qartë në qëllimin e saj për t’u bërë anëtare dhe për të kontribuuar në këtë drejtim, për këtë arsye është shumë me rëndësi që çdo anëtar i NATO-s ta mbështesë antarësimin e Kosovës në Partneritetin për Paqe”.
Osmani ka cilësuar Kosovën si një ndër vendet me intervenimin më të sukseshëm ndërkombëtar ushtarak të NATO-s.
Nga ana tjetër, kryetari i Kuvendit të Kosovës, Glauk Konjufca, u fokusua në agresionin rus në Ukrainë dhe pasojat që ky agresion ka shkaktuar në të gjithë sigurinë globale gjersa theksoi edhe rëndësinë e NATO-s në sigurinë e Republikës së Kosovës.
“Republika e Kosovës mbetet e përkushtuar për një bashkëpunim të ngushtë me Aleancën Veriatlantike. NATO-ja kontribuon drejtpërdrejt në sigurinë e shtetit tonë. Kosova do t’i kryejë të gjitha reformat e nevojshme që një ditë të bëhet anëtare e NATO-s. Së bashku do ta kthejmë FSK-në në një ushtri bashkëkohore dhe të integruar plotësisht në NATO“, theksoi Konjufca.
Seminari numërohet të ketë më shumë se 100 pjesëmarrës, duke përfshirë deputetë nga vendet anëtare të NATO-s dhe atij të Kuvendit të Kosovës. Ky seminar është i dyti i llojit të tij në Kosovë, i cili pritet të zgjasë tri ditë.