Është viti 1997 dhe Garry Kasparov është i përkulur mbi një tabelë shahu, dukshëm i frustruar.
Ai po tund kokën me mosbesim, ndërsa pret që kundërshtari i tij të vendosë lëvizjet e fundit për një fitore të pashmangshme.
Më në fund, Kasparov bën lëvizjen e tij të fundit, ngrihet në këmbë dhe vrapon larg nga tabela e shahut. Ai mbetet i shtangur që u mund nga një kompjuter.
Kundërshtari i tij ishte superkompjuteri IBM Deep Blue, një kompjuter që ishte i aftë të realizonte mesatarisht 20 milionë lëvizje në sekondë.
Por, për një gjë Kasparov ishte i sigurt duke shkuar në ndeshje. Ai ishte Michael Jordan i shahut në atë kohë.
Ai kishte mposhtur kompjuterët që luanin shah që nga vitet ’80 , madje ai mundi një version të mëparshëm të Deep Blue më 1996 dhe konsiderohej pothuajse i pamposhtur.
Kështu, kur Kasparov, një nga shahistët më të mëdhenj të të gjitha kohërave, humbi nga një kompjuter para një publiku global, njerëzit filluan të pyesin veten nëse ishte vetëm çështje kohe para se kompjuterët t’i kalonin njerëzit në aspekte të tjera të jetës.
Menjëherë pas ndeshjes, Kasparov mbeti mjaft i hidhëruar.
Në dhjetor të vitit 2016, duke diskutuar ndeshjen në një podcast me neuroshkencëtarin Sam Harris, Kasparov u shpreh për një ndryshim të pikëpamjeve të tij për këtë ndeshje.
Kasparov tha se, “Gjatë shkrimit të librit kam bërë shumë kërkime, duke analizuar lojërat me kompjuterë modernë, dhe kam ndryshuar përfundimet e mia”.
Ai shtoi se, “unë nuk po i shkruaj asnjë letër dashurie IBM, por respekti im për ekipin e Deep Blue u rrit dhe mendimi im për lojën time dhe lojën e Deep Blue u ul”.
Sepse, sipas tij, sot mund të blihet një tjetër model i makinës së shahut ose model i një kompjuteri të ri që do ta mposhtë shumë lehtë “Deep Blue”.
Kjo lojë e veçantë ishte e para në një radhë ndeshjesh të zhvilluara në Filadelfia.
Kasparov u kthye në ndeshjet e tjera shumë më i fortë, duke luftuar kompjuterin në dy barazime dhe tre fitore, kështu duke fituar ndeshjen e përgjithshme.
Fitorja e Deep Blue u pa, simbolikisht, shumë domethënëse. Ajo tregoi një shenjë se inteligjenca artificiale po tejkalonte inteligjencën njerëzore dhe se arriti të mposhte një nga kampionët e mëdhenj intelektual të njerëzimit.
Studimet e mëvonshme tentuan të minimizonin humbjen e Kasparov si rezultat i lojës së keqe nga ana e tij, dhe të zvogëlonin vlerën intelektuale të shahut si një lojë që mund të mposhtet me forcë brutale.
Marrë nga Rare Historical Photos, përshatur nga RTV Dukagjini