Ekspozita “Dostat e Janjevës” do të fillojë të enjten e 8 shtatorit duke filluar nga ora 19:00 në Shtëpinë e Evropës në Prishtinë.
Kjo ngjarje do të zgjasë për 12 ditë deri me datën 20 shtator.
“Dostat e Janjevës”, është ekspozita personale e fotografit Arben Llapashtica, brenda së cilës fotografitë kanë ndërlidhje të kohës dhe hapësirës.
Çdo ndërtesë në fotografi ka një histori, dhe çdo njëri në Janjevë ka një rrëfim.
Arben Llapashtica ka lindur në vitin 1979, dhe për nga veprimtaria është filmbërës, kameraman dhe fotograf.
Se fotografitë e tij janë të realizuara në mënyrë profesionale e tregon fakti se Llapashtica është shpërblyer me më shumë se 20 çmime në gara të fotografive dhe videove në Kosovë dhe Evropë.
Llapashtica ka fituar çmime edhe në Evropë, kjo pasi veprimtarinë e tij e ka shtrirë edhe në vendet evropiane.
Ndër vendet e fundit që kameramani ka shfaqur fotografitë e tij janë: Belgjika, Kroacia, Austria, Italia, Serbia dhe Shtetet e Bashkuara të Amerikës.