Drejtori i Arsimit në Pejë, Naser Gega, ka bërë një vlerësim të kujdesshëm për vendimin e fundit të Ministrisë së Arsimit, Shkencës, Teknologjisë dhe Inovacionit (MAShT) në lidhje me blerjen e librave shkollorë.
Megjithëse ky vendim nuk është në diskrecionin e tij për ta mbështetur apo kundërshtuar, ai për Telegrafin ka theksuar se mbetet për t’u zbatuar, me të gjitha sfidat dhe vështirësitë që e shoqërojnë.
“Është vendim i Ministrisë së Arsimit, nuk është vendim që më mbetet mua me përkrahë apo jo, por më mbetet vetëm për ta zbatuar dhe ka me pas sfida dhe vështirësitë e veta”, ka thënë Gega.
Ai ka sqaruar se, sikurse vitin e kaluar, edhe këtë vit është e domosdoshme që në secilën shkollë të caktohet një person, qoftë mësimdhënës apo dikush tjetër me njohuri të mjaftueshme, për të ndihmuar prindërit në procesin e aplikimit në sistemin e-Kosova.
“Jo të gjithë kanë për të pasur njohuri dhe aftësi për të aplikuar, ka për të pasur vështirësi”, ka shtuar ai.
Një nga shqetësimet kryesore të Gegës për këtë vit mbetet krijimi i radhëve të gjata në librari për sigurimin e teksteve shkollore.
Sipas tij, ky problem mund të tejkalohet, por nuk do të jetë pa kosto.
“Shqetësimin më të madh e kam tash të radhët e mëdha që do të krijohen në librari për tekste shkollore, edhe besoj e kalojmë, mirëpo ka me pas koston e vet edhe kjo”, vuri në dukje Gega.
Sa i përket procesit të aplikimit për mjetet financiare, Gega theksoi se gjatë vitit të kaluar nuk kanë hasur në ndonjë problem të madh./Telegrafi