Drejtori i Përgjithshëm i Policisë së Kosovës, Gazmend Hoxha, ka vizituar policin e plagosur dhe atë të lënduar, të cilët u përballën me grabitësit e armatosur në një argjendari në Suharekë.
“Po ashtu në orët e pasditës, drejtori Hoxha vizitoi në SHSKUK edhe zyrtarin policor, i cili u plagos sot gjatë realizimit të operacionit policor për identifikim dhe arrestim të grabitësve të rastit në Suharekë”, ka njoftuar Policia e Kosovës.
Në njoftim thuhet se veprimet profesionale të zyrtarëve policorë, të cilët në vetëmbrojtje u detyruan të përdorin forcën proporcionale, bënë neutralizimin e grabitësit që shtiu me armë zjarri, si dhe arrestimin e disa të dyshuarve të tjerë.
“Drejtori Hoxha, fillimisht iu dëshiroi shërim të shpejtë zyrtarëve policorë dhe njëherit i falënderoi ata për punën, guximin dhe përkushtimin e vazhdueshëm për t’i shërbyer qytetarëve dhe vendit”, thuhet tutje në njoftim.
Njëkohësisht, drejtori Hoxha ka shprehur mbështetje dhe përkrahje të pakursyer ndaj zyrtarëve policorë dhe ka uruar që të kthehen së shpejti në familjen e madhe policore.