Autoritetet në Dubai kanë njoftuar se të gjithë banorët e një ndërtese banimi në zonën Dubai Creek Harbour janë të sigurt dhe nuk ka të lënduar, pas rënies së një droni që shkaktoi zjarr.
“Autoritetet kanë kontrolluar plotësisht zjarrin dhe të gjithë banorët janë të sigurt. Nuk raportohet asnjë i lënduar”, tha zyra e medias e qytetit në një postim në X.
Postimi nuk përmend se nga ka ardhur droni.
Zyra e medias e qeverisë së Dubait tha se autoritetet po përgjigjen ndaj “incidentit me një dron që ra mbi një ndërtesë pranë Dubai Creek Harbour”, raporton BBC.
Dubai Creek Harbour ndodhet rreth 8 km nga Aeroporti Ndërkombëtar i Dubait, aeroporti më i frekuentuar në botë për trafikun ndërkombëtar të pasagjerëve.
Ky incident ndodh pas një rezolute të përgatitur nga vendet e Gjirit që kërkon ndalimin e sulmeve nga Irani, e cila ka marrë mbështetjen e Këshillit të Sigurimit të OKB-së.