Policia e Kosovës ka njoftuar arrestimin e një shtetasi të huaj, i kërkuar nga autoritetet daneze për disa vrasje.
Arrestimi u realizua nga njësia ‘FAST Kosova’, në bashkëpunim me Njësinë për Reagim të Shpejtë (NJRSH) dhe njësitë e rendit publik, si pjesë e një operacioni të koordinuar në terren.
“Sot, më 23.03.2026, në Prishtinë, Policia e Kosovës, pas një pune operative në terren, përkatësisht njësia ‘FAST Kosova’, në bashkëpunim me njësitë policore të rendit publik dhe Njësinë për Reagim të Shpejtë (NJRSH), ka realizuar me sukses arrestimin e një shtetasi të huaj të kërkuar nga autoritetet ndërkombëtare për veprën penale ‘vrasje’.
Arrestimi është kryer në bazë të një letër-rreshtimi ndërkombëtar (Red Notice), të lëshuar nga autoritetet e INTERPOL-it të Danimarkës.
Rasti është duke u trajtuar në koordinim të ngushtë me Prokurorinë Speciale të Republikës së Kosovës, ndërsa autoritetet kompetente janë duke ndërmarrë veprimet e mëtejme ligjore në përputhje me procedurat në fuqi.
Policia e Kosovës mbetet e përkushtuar në luftimin e krimit të organizuar si dhe bashkëpunimin ndërkombëtar për garantimin e sigurisë së përgjithshme”, thuhet në njoftim.
Sipas informacioneve të INTERPOL-it dhe rrjetit ENFAST (“European Network of Fugitive Active Search Teams”) të Bashkimit Evropian, i arrestuari, i identifikuar si Liridon Fetahi, ishte i kërkuar për dy raste të vrasjeve në Danimarkë.
Prill 2020 – një viktimë u qëllua dhe u vra në një parking publik.
Nëntor 2020 – tre persona u qëlluan; dy prej tyre humbën jetën.
Ai dyshohet të jetë pjesë e një bande kriminale daneze dhe ishte një ndër personat më të kërkuar në Danimarkë.
Arrestimi është bërë në bazë të një letër-rreshtimi ndërkombëtar (“Red Notice”) të lëshuar nga INTERPOL-i.