Policia e Kosovës ka bërë të ditur se dy sirianë të therur me thikë janë gjetur në fshatin Koshuticë të Leposaviqit në vende të ndryshme.
Siç bëhet e ditur në raportin 24-orësh të Policisë, rasti ka ndodhur të mërkurën dhe i njëjti është cilësuar si ‘vrasje në tentative’, njofton Dukagjini.
“Dy dëshmitare femra kosovare, kanë raportuar se në oborrin e shtëpisë së tyre kanë vërejtur një person të shtrirë me plagë nëpër pjesë të ndryshme të trupit të shkaktuara nga mjeti i mprehtë. Viktima mashkull i moshës rreth 40-vjeçar, shtetas i Sirisë është dërguar për tretman mjekësor në Spitalin e Mitrovicës Veri dhe më pas është transferuar në Spitalin e Mitrovicës Jugu për trajtim të mëtutjeshëm”, thuhet në raportin policor.
Në raport bëhet e ditur se tjetri është gjetur nga njësiti i Policisë gjatë patrullimit në fshat Koshuticë.
“Rreth orës 11:05 jemi njoftuar se njësiti nga SPMK Jarinje gjatë patrullimit në fshatin Koshuticë ka vërejtur një person mashkull Sirian i moshës 27-vjeçar me lëndime në kokë dhe këmbë që dyshohet se plagët janë shkaktuar nga mjeti i mprehtë”, thuhet në njoftim.
Tutje bëhet e ditur se viktima ka deklaruar se i dyshuari është larguar në drejtim të kufirit të Serbisë.
Viktima është dërguar në Spitalin e Mitrovicës Jugu për tretman të mëtutjeshëm.