Të dielën, siç ka njoftuar Policia e Kosovës, dy vdekje të dyshimta kanë ndodhur në Prishtinë dhe Podujevë.
Në Podujevë një person dyshohet se ka pësuar lëndime aksidentale, si pasojë e të cilave ka humbur jetën.
Mjeku kompetent, i cili kishte arritur në vendngjarje, ka konstatuar vdekjen e viktimës.
Sipas raportit 24-orësh të Policisë, me urdhër të prokurorit, trupi i pajetë i viktimës është dërguar në Institutin Mjekësor Ligjor (IML) për obduksion.
Rasti është inciuar “Hetim mbi vdekjen”.
“Podujevë / 12.11.2023 – 11:55. Është raportuar se viktima mashkull kosovar dyshohet se si pasojë e lëndimeve të marra pasi ishte lënduar aksidentalisht, ka ndërruar jetë. Lidhur me rastin në vendngjarje kanë dalë njësitë përkatëse, me ç’rast mjeku kompetent ka konstatuar vdekjen e viktimës, me urdhër të prokurorit trupi i pajetë i viktimës është dërguar në IML për obduksion. Rasti nën hetime”, thuhet në njoftimin e Polciisë.
Ndërsa, në Prishtinë një tjetër mashkull kosovar është gjetur pa shenja jete.
Mjeku kompetent, i cili ka ekzaminuar trupin e viktimës, ka konstatuar vdekjen e tij.
Me vendim të prokurorit, trupi i pajetë i viktimës është dërguar në IML për obduksion. Rasti po ashtu është nën hetime.
“Prishtinë / 12.11.2023, 15:52. Është raportuar se viktima mashkull kosovar është gjetur pa shenja jete. Njësitet relevante policore dhe ekipi mjekësor kanë dalë në vendin e ngjarjes, me ç’rast nga mjeku kompetent është konstatuar vdekja e viktimës. Me vendim të prokurorit trupi i pajetë është dërguar në IML për obduksion”, thuhet në raportin 24-orësh të Policisë.