Një çift u gjet i vdekur në banesën e tyre në Epinal të Francës. Sipas elementeve të para të hetimit, burri dhe gruaja dyshohet se janë vrarë me thikë.
Pasi ndihma e shpejtë kishte mbërritur në vendin e ngjarjes, trupat e burrit dhe gruas të moshës 44 dhe 45 vjeç, ishin pa jetë.
Sipas hulumtimeve të para të rastit, burri dhe gruaja janë vrarë me thikë, ndërsa katër nga shtatë fëmijët, duke përfshirë dy të rritur nga kjo familje me origjinë kosovare, i nënshtrohen kujdesit psikologjik në spital, sipas France Bleu.
Policia, pasi kishte thyer derën, kishte parë trupat e pajetë të çiftit kosovar në banesën e tyre.
Sipas mediave franceze, përcjell RTV Dukagjini, policia ishte njoftuar nga fqinjët, që dëgjuan klithma të një përleshjeje, rreth orës 8:30 të mëngjesit.
Megjithatë, sipas France 3, e cila citon një burim, “disa dëshmitarë pohojnë, gjithashtu, se një nga adoleshentët e vëllezërve dhe motrave mbante një thikë në dorë kur mbërriti ndihma”.
Ndëkaq, sipas informacioneve, thuhet se ishte fëmija më i madh ai që i kishte dërguar më të rinjtë në shkollë. Fëmijët e tjerë 5, 9 dhe 14 vjeçar, ishin në shkollë në momentin e tragjedisë.
Sipas dëshmitarëve, familja ishte shpërngulur në këtë lagje prej më pak se dy vjet. Nëna, e cila do të ishte viktimë e dhunës në familje, ishte strehuar në disa raste te një fqinj. Prokurori publik i Epinal, Frédéric Nahon, ka thënë se hetimi po vazhdon dhe se asnjë hipotezë nuk është “e privilegjuar” për momentin për rrjedhën e fakteve.