Një person është arrestuar nën dyshimin se i njëjti ka vrarë një person në fshatin Kijevë të komunës së Malishevës.
Lajmin për portalin Dukagjini e kanë konfirmuar zëdhënësi i Policisë për rajonin e Gjakovës, Sheremet Elezaj dhe drejtori Rajonal i Policisë në Gjakovë, Lumni Graishta.
“Sot rreth orës 09:50 është raportuar për një rast vrasje në fshatin Kijevë-Malishevë. Në vendin e ngjarjes, menjëherë kanë dalë njësitet e nevojshme policore, ku është gjetur një person mashkull (i moshës madhore dyshohej pa shenja jete). Vdekjen e tij e ka konstatuar ekipi mjekësor në vendin e ngjarjes. Lidhur me rastin është arrestuar një i dyshuar, mashkull i moshës madhore”, ka thënë Elezaj.
Tutje, ky i fundit ka bërë të ditur se hetimet janë duke vazhduar në drejtim të veprës penale të vrasjes.
“Rrjedha e mëtejme hetimore është duke vazhduar në koordinim me prokurorin e shtetit, në drejtim të veprës penale të vrasjes”, ka thënë Elezaj.