Platforma digjitale e shërbimeve publike, eKosova, tani është e aksesueshme edhe si aplikacion për pajisjet iOS dhe Android.
Lajmin e ka bërë të ditur kryeministri, Albin Kurti, përmes një postimi në Facebook, ku ka theksuar rëndësinë e kësaj platforme në ofrimin e shërbimeve elektronike për qytetarët dhe bizneset.
Sipas Kurtit, eKosova ka tashmë mbi 1 milion përdorues të regjistruar dhe ofron më shumë se 220 shërbime elektronike.
“Me më shumë se 1 milion përdorues të regjistruar dhe mbi 220 shërbime elektronike të zhvilluara, eKosova është dritarja jonë digjitale për qytetarët dhe bizneset.
Certifikatat e gjendjes civile, certifikatat e pronës dhe kopjet e planit, obligimet e tatimit në pronë e gjobat në trafik, vazhdimi i regjistrimit të veturës, certifikata për historinë penale, aplikimet për shtesa, benefite, grante e subvencione, pagesat elektronike, e së fundmi edhe raporti kreditor – të gjitha këto shërbime dhe shumë të tjera tani janë në dispozicion online në e-Kosova, më lehtë se kurrë më parë!
Vazhdojmë me digjitalizimin për shërbime më të mira për të gjithë!”, ka shkruar Kurti në Facebook.