Ministria e Punëve të Jashtme dhe Diasporës e Kosovës ka organizuar riatdhesimin e shtetasve të Bosnjë dhe Hercegovinës me një fluturim nga Riadi drejt Prishtinës (Numri i fluturimit: XY1237).
Aeroplani me shtetasit boshnjakë pritet të ateroj në Prishtinë sonte në ora 23:00. Sipas burimeve të Dukagjinit, në këtë fluturim ndodhen gjithsej 13 persona, njëri nga ta me pasaportë amerikane.
Dukagjini nga burimet e veta brenda ministrisë merr vesh ekskluzivisht se operacioni humanitar dhe logjistik u realizua me kërkesë të Ministrisë së Punëve të Jashtme të Bosnjë dhe Hercegovinës, në kuadër të bashkëpunimit rajonal dhe diplomatik për t’u ardhur në ndihmë qytetarëve në nevojë.
Në koordinimin e këtij procesi, burimet e Dukagjinit thonë se rol të rëndësishëm ka pasur Ambasada e Kosovës në Zagreb, e cila ka bashkëpunuar me institucionet përkatëse dhe përfaqësitë diplomatike për të mundësuar kthimin e sigurt dhe të organizuar të udhëtarëve.
“Në zbatimin e këtij riatdhesimi rol kyq ka pasur Ambasada e Republikës së Kosovës në Zagreb, e cila ka marrë pjesë aktive në koordinimin ndërmjet institucioneve përkatëse dhe përfaqësive diplomatike, me qëllim që të mundësohej kthimi i sigurt dhe i organizuar i udhëtarëve. Ky veprim konfirmon rëndësinë e solidaritetit ndërmjet shteteve dhe të komunikimit efektiv diplomatik në situata kur kërkohet veprim i shpejtë dhe i koordinuar për të siguruar mbrojtjen dhe kthimin e qytetarëve”.
“Ministria e Punëve të Jashtme dhe Diasporës e Kosovës edhe një herë ka dëshmuar gatishmërinë që, në bashkëpunim me shtetet partnere dhe rrjetet diplomatike, të kontribuojë në zgjidhjen e çështjeve humanitare dhe konsullore me rëndësi rajonale”, thotë burimi.
Ky riatdhesim është shembull i bashkëpunimit ndërmjet shteteve dhe i koordinimit diplomatik për zgjidhjen e çështjeve humanitare dhe konsullore me rëndësi rajonale.