Agjencia Evropiane e Barnave ka njoftuar që një valë e re infeksionesh COVID-19 do të godasë kontinentin në javët e ardhshme.
EMA ka mbajtur një konferencë për shtyp në Holandë ku zyrtarët kanë thënë se pandemia nuk ka mbaruar dhe se varianti Omicron vazhdon të ndryshojë dhe për këtë arsye të shkaktojë shqetësim.
“Javën e kaluar një nga këto variante të reja të Omicron që quhet BQ.1 është identifikuar në të paktën pesë vende në Bashkimin Evropian dhe Zonën Ekonomike Evropiane,” ka theksuar Dr. Marco Cavaleri, Drejtues i Strategjisë së Kërcënimeve Shëndetësore dhe Vaksinave.
“Sipas ECDC BQ.1 dhe çdo nën-linjë, e cila quhet BQ.1.1 do të bëhet dominuese nga mesi i nëntorit deri në fillim të dhjetorit”, ka shtuar ai.
EMA ka theksuar se pret që vala e re të filloj brenda një jave dhe ka shtuar se virusi po evoluon më shpejt se aftësia për të furnizuar vaksinat adaptive, të cilat janë ende në fazat e hershme të zhvillimit, raprton euronews.
Ndërkaq kanë thënë që virusi i gripit do të qarkullojë në të njëjtën kohë me COVID-19 këtë dimër dhe rekomandojnë që personat e grupeve me rrezik të lartë të vaksinohen kundër të dyjave.