Në një konferencë për shtyp rreth të ardhurave të Teslës të mërkurën, njeriu më i pasur në botë mendoi për të ardhmen e robotëve Optimus të kompanisë së tij dhe kontrollin e tij mbi ta.
Tesla mund të jetë një prodhues makinash elektrike, por CEO i saj, Elon Musk, e sheh kompaninë shumë më gjerë: si një novator në fushën e inteligjencës artificiale dhe softuerëve, e madje si ndërtues të robotëve që do të ndryshojnë botën.
Në korrik, Musk deklaroi se Tesla duhet të vlejë shumë më tepër sesa sot – deri në 20 trilionë dollarë, një shumë që është më shumë se pesëfishi i vlerës aktuale të kompanisë Nvidia.
Por përveç ambicieve për kompaninë, Musk ka bërë të qartë se kërkon edhe shpërblim të jashtëzakonshëm financiar. Në nëntor, aksionarët e Teslës do të votojnë për propozimin e bordit që parashikon t’i paguajë Musk 1 trilion dollarë gjatë dekadës së ardhshme.
Marrëveshja do ta rriste gjithashtu pjesën e tij në pronësinë e kompanisë nga 13 për qind në 25 për qind, por vetëm nëse Musk arrin disa objektiva tepër ambiciozë:
- 20 milionë automjete të dorëzuara,
- 1 milion taksi robotike në funksion,
- një vlerë tregu prej 8.5 trilionë dollarësh,
- dhe 1 milion robotë humanoidë “Optimus” të prodhuar dhe shpërndarë.
Gjatë një telefonate me investitorët të mërkurën, Musk u ndal pikërisht te kjo e fundit – robotët – duke dhënë ndoshta argumentin më të fortë deri tani përse kërkon më shumë kontroll te Tesla.
“Shqetësimi im kryesor për kontrollin e votave në Tesla është: nëse ndërtoj një ushtri kaq të madhe robotësh, a mund të përfundoj i përjashtuar në një moment të ardhshëm?” tha ai.
“Nëse ne ndërtojmë këtë ushtri robotësh, a do të kem të paktën një ndikim të fortë mbi të? Jo domosdoshmërisht kontroll, por ndikim të fortë… Nuk ndihem rehat të ndërtoj një ushtri robotësh pa e pasur atë ndikim”.
Për Teslën, sipas tij, Optimus do të jetë “një burim i pafund parash”, duke argumentuar se çdo njeri do të dëshirojë një robot humanoid që mund të kryejë punët në vend të tij./Wired