Themeluesi i Tesla-s, Elon Musk, është liruar nga keqbërja për një postim në Twitter, në të cilin ai tha se kishte “siguruar fonde” për të privatizuar prodhuesin e makinave elektrike.
Musku u përball me një padi grupore të ngritur në emër të aksionerëve të Tesla-s, të cilët argumentuan se ai i mashtronte ata me postimet e tij, në gusht 2018, raportoi BBC-ja të shtunën.
Blerja e propozuar prej 72 miliardë dollarësh nuk u realizua kurrë.
Ndërkaq, nëse juria e San Franciskos do ta kishte shpallur Musk si përgjegjës, ai mund të ishte urdhëruar të paguante miliarda dollarë dëmshpërblim.
E për këtë nëntë anëtarëve të jurisë iu deshën më pak se dy orë për të marrë vendimin e tyre pasditen e së premtes.
Musk ndonëse donte që gjyqi të zhvendosej në Teksas, ku është vendosur Tesla, duke argumentuar se nuk mund të merrte një gjykim të drejtë në San Francisko, e mirëpriti rezultatin.
Dhe reagoi përmes një postimi në Twitter duke thënë se është mirënjohës që juria e shfaqi pafajësinë e tij.
“Unë jam thellësisht mirënjohës për gjetjen unanime të jurisë për pafajësinë në çështjen Tesla”, ka shkruar ai.