Misioni i Bashkimit Evropian për Sundimin e Ligjit në Kosovë (EULEX), lidhur me operacionet e Policisë së Kosovës në veri, ka theksuar se nuk ndërhynë në to, pasi komponentë kryesore e mandatit është vetëm monitorimi.
Në deklarimin e tyre, thuhet se EULEX-i ka mandat që të ndihmojnë në fuqizimin e institucioneve të sundimit të ligjit në Kosovë, për t’i bërë ato të qëndrueshme dhe llogaridhënëse, duke garantuar të drejtat e të gjithëve pa diskriminim.
“Siç është e ditur, EULEX-i nuk ka mandat ekzekutiv që nga viti 2018. EULEX-i është i mandatuar të ndihmojë fuqizimin e institucioneve të sundimit të ligjit në Kosovë me qëllim që ato të jenë të qëndrueshme, llogaridhënëse, dhe të munden të garantojnë në mënyrë efektive të drejtat e secilit, pa diskriminim. Në këtë drejtim, monitorimi është komponentë esenciale e mandatit të EULEX-it. Për ushtrimin efektiv të kapacitetit tonë të monitorimit të thuktë, neve na duhet të kemi edhe prezencë fizike në skenën e aktiviteteve që kryhen nga institucionet e Kosovës përgjatë tërë zinxhirit të drejtësisë”, thuhet në deklaratën e tyre.
Kjo sipas EULEX-it, nënkupton monitorim në teren si palë e paanshme ndaj qëndrimit dhe veprimeve të autoriteteve të Kosovës, për vlerësimin e përputhshmërisë së tyre me parimet e sundimit të ligjit dhe detyrimet për të drejtat e njeriut, me zotim të qartë kundër çdo forme të shkeljes së të drejtave të njeriut dhe të diskriminimit.
Gjatë kryerjes së aktiviteteve të monitorimit, EULEX-i ka potencuar se respektojnë në tërësi pavarësinë e autoriteteve gjyqësore dhe parimin e mosndërhyrjes, dhe në rast se përmes këtyre aktiviteteve të monitorimit identifikohen mangësi të rënda, “Misioni i adreson ato me autoritetet përgjegjëse relevante”.