Federata e Basketbollit të Kosovës (FBK) ka reaguar të premten pas raportimit për arrestimin e tre personave të dyshuar për kurdisje të ndeshjeve.
FBK-ja ka thënë se është duke bashkëpunuar ngushtë me institucionet dhe organet e rendit, lidhur me arrestimet e fundit.
Siç thuhet në reagimin e tyre, ata raportuan menjëherë rastin pranë Këshillit për Parandalimin e Dhunës dhe Dukurive Negative në Ngjarjet Sportive, Policisë së Kosovës dhe Prokurorisë së Shtetit dhe morën masat e duhura për të bashkëpunuar me organet e rendit.
FBK gjithashtu ka njoftuar se ka ndërmarrë procedurat e brendshme disiplinore ndaj personave të apostrofuar dhe ka koordinuar veprimet me FIBA (Federata Ndërkombëtare e Basketbollit).
“Ne e kemi raportuar menjëherë pranë Këshillit për Parandalimin e Dhunës dhe Dukurive Negative në Ngjarjet Sportive të themeluar nga Ministria e Kulturës, Rinisë dhe Sportit, Policisë së Kosovës dhe Prokurorisë së Shtetit rastin sapo na është bërë i ditur, kemi marrë të gjitha masat e nevojshme për të bashkëpunuar me organet e rendit që nga viti i kaluar, si dhe i kemi marrë masat e duhura për të iniciuar dhe zhvilluar procedurat e brendshme disiplinore ndaj personave të apostrofuar, gjithë kohën në bashkëpunim dhe koordinim të ngushtë me FIBA”, thuhet në reagimin e FBk-së.
Federata e Basketbollit të Kosovës mirëpret vendimet e organeve të rendit dhe shpreson në zgjidhjen e shpejtë të rastit dhe dërgimin e personave të përfshirë para drejtësisë.
Ata shprehin vendosmërinë e tyre për të luftuar çdo dukuri negative në sportin e tyre dhe angazhohen për garantimin e integritetit të garave në basketboll.