Rrebeshi i shiut nuk ishte asgjë për futbollistët e Ferizajt.
Rikthimi në Superligë pas dy viteve mungesë do të thotë që ky është vetëm fillimi i fazës përgatitore.
“Do të vazhdojmë me ritmin të cilin e kemi paraparë, e nga java e ardhshme do të fillojmë me dy stërvitje në ditë,” u shpreh trajneri, Arbnor Morina.
Gjatë këtij afati kalimtar, Ferizaj ka qenë mjaft aktive – por se a do të kemi ende ndryshime në klub tregon trajneri i mirënjohur kosovar.
“A do të sjellim edhe dikë? E gjitha varet nga momenti, do të shohim se a po çalojmë diku apo jo,” shtoi Morina.
Pamjet e siguruara nga RTV Dukagjini qartë tregojnë atmosferën e mirë në grup, por këtë situatë Morina nuk e ka gjetur qysh në fillim.
Trajneri Arbnor Morina shtoi: “Te lojtarët ka qenë një atmosferë e zymtë, detyra primare ka qenë që këta djem me i zgju nga gjumi, me i zgju nga letargjia sepse fundi i fundit në futboll ka edhe humbje edhe fitore. Por, psikologjikisht këta djem kanë filluar të ngritën dhe me punë e përkushtim kanë arritur rezultatin e duhur.”
Mirëpo, përtej kësaj – te Ferizaj një problem i madh është infrastruktura, me klubin e rikthyer që është një nga shumë grupet e Superligës pa një terren adekuat për lojë.
“Qyteti i Ferizajit e meriton një stadium dinjitar, një stadium që prezantohet mirë por edhe FC Ferizaji me klubet tjera,” ka thënë drejtori sportiv.
Këto probleme megjithatë nuk shfaqin problem për futbollistët – e një ndër transferimet e kësaj vere, Astrit Fazliu, tregon synimet e klubit.
“Synimi është të bëjmë një ekip konkurrente, një ekip që ndër vite konkurron në rangun më të lartë në Superligë,” u shpreh lojtari Astrit Fazliu nga FC Ferizaj.
Për rolin e tij në skuadër si kapiten, është shprehur shumë i lumtur bartësi i shiritit te Ferizaj – Florim Berisha.
“Është një ndjenjë e mirë duke marrë parasysh se është një klub me traditë të madhe, dhe është kënaqësi ta bartësh shiritin e kapitenit të kësaj skuadre,” ka thënë kapiteni i skuadrës, Florim Berisha.
Derisa për fund, të intervistuarit zgjodhën që të përcjellin një mesazh edhe te tifozët e klubit.
“Me u mundu sa ma shumë gëzime me i sjellë publikut, por gjithmonë me qenë real dhe me këmbë në tokë,” shtoi Morina.
“Unë po besoj se do të jemi befasia e kampionatit,” u shpreh Selmani.
Ndër të tjera Fazliu si përfundim ka thënë se: “Tifozët e Ferizajit nuk e kanë merituar gjendjen e klubit siç ka qenë, e tash mesazhi i imi por edhe i gjithë ekipit është që do të japim gjithmonë maksimumin, do të dalim nga vetja për të dhënë maksimumin për tifozët tanë”.
Me shpresën që aventura e tyre në Superligë nuk do të jetë e shkurtër, FC Ferizaj synon që të rikthejë lavdinë në qytet me spektakël futbolli.