Zëvendësministrja e Mbrojtjes ukrainase, Hanna Malyar, ka njoftuar se forcat ukrainase kanë rikthyer kontrollin e 130 kilometrave katrorë në jug të vendit.
Ajo gjithashtu ka theksuar se ushtria ukrainase po avancon në qytetet e Melitopolit dhe Berdyans’k në rajonin Zaporizhzhia, duke u përballur me rezistencën e ashpër ruse dhe humbje “të konsiderueshme” në njerëz dhe pajisje.
Sipas saj, përgjatë vikendit, zona e territoreve të çliruara është rritur për 17 kilometra katrorë.
“Në total, prej nisjes së kundërofensivës, zona e çliruar në jug shkon në 130 kilometra katrorë”, ka thënë ajo.
Sipas raportit të Shtabit të Përgjithshëm të ushtrisë ukrainase, forcat ukrainase kanë zmbrapsur me sukses sulmet ruse në rajonet e Donetksut dhe kanë mposhtur 36 sulme në zonat e Limanit, Bakhmutit, Avdivkës, Marinakës dhe zonave të tjera rreth tyre.
Të dielën, komanda ushtarake lindore e Ukrainës ka thënë se Kievi përparoi 600 metra në 1 mijë metra gjatë një dite më parë pranë Bakhmut, një “qytet i pushtuar” nga forcat mercenare ruse Wagner në maj pas muajsh luftimesh, raporton Reuters.
Lufta në Ukrainë ka nisur më 24 shkurt të vitit 2022.
Presidenti rus, Vladimir Putin, e quan luftën si “operacion special ushtarak” për ta çmilitarizuar Ukrainën.
Perëndimi është përgjigjur ndaj Rusisë duke goditur ekonominë e këtij shteti me sanksione të ashpra.
Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.