Ministri i Mbrojtjes, Armend Mehaj, të dielën e 22 majit ka njoftuar se brenda këtij viti do të hapin konkursin edhe për 600 ushtarë të rinj, që do t’i bashkohen Forcës së Sigurisë së Kosovës(FSK).
Përmes një postimi në Facebook, Mehaj ka treguar se për 11 muaj kanë rekrutuar një mijë e 240 ushtarë.
“Me punë e përkushtim, nuk ka asgjë të pamundur. Në mbrojtje e në shërbim të Republikës nuk ka asgjë që na ndal. Brenda këtij viti do të hapim konkrusin edhe për 600 ushtarë të rinj, do të rrisim edhe më tutje kapacitetet tona mbrojtëse”, ka shkruar Mehaj.
Ministri ka theksuar se krahas kësaj, blerja e armatimit vazhdon të mbetet prioritet kryesor.
Ndër të tjera, Mehaj ka thënë se “Ushtria jonë është siguria e vendit dhe e qytetarëve tanë, është garancë për paqe dhe stabilitet të qëndrueshëm.”
Në fund, ai ka falënderuar Komandën e Doktrinës dhe Stërvitjes me të gjithë instruktorët e saj, për punën e shkëlqyer, nga duart e të cilëve dalin gjenerata të reja të arta të kombit.
“Një falënderim të veçantë, meriton Komanda e Doktrinës dhe Stërvitjes me të gjithë instruktorët e saj, për punën e shkëlqyer, nga duart e të cilëve dalin gjenerata të reja, të arta të kombit tonë”, ka shtuar ai.
Ndryshe, të shtunën e 21 majit, Ministria e Mbrojtjes ka njoftuar se do të hapë konkurs për 75 pozita të profesioneve të ndryshme.
Në njoftim, thuhej se konkursi do të hapet gjatë periudhave të ndryshme kohore, sipas fushave të caktuara specifike. Sipas Ministrisë së Mbrojtjes, procesi i punësimit të kategorive të kërkuara do të jetë transparent dhe në përputhje të plotë me rregullat në fuqi.
Ministria e Mbrojtjes do të hapë konkurs për personel civil në 75 pozita specialistike