Një diplomat i lartë rus ka përjashtuar mundësinë e një zgjidhjeje të negociuar të luftës në Ukrainë dhe ka paralajmëruar se situata mund të kthehet në një konflikt të zgjatur.
Gennady Gatilov, përfaqësuesi i Rusisë në OKB në një intervistë për “Financial Times”, tha gjithashtu se nuk do të ketë takim të drejtpërdrejtë midis presidentit ukrainas, Volodymyr Zelensky dhe liderit rus, Vladimir Putin.
Përfaqëuesi i Rusisë në OKB ka pretenduar se Kievi dhe Moska kishin qenë “shumë afër” me një marrëveshje për t’i dhënë fund konfliktit në prill dhe ka akuzuar vendet perëndimore për zgjatjen e konfliktit “deri në Ukrainën e fundit”.
“Sa më shumë të vazhdojë ky konflikt, aq më e vështirë do të jetë të kemi një zgjidhje diplomatike,” tha Gatolov, njofton BBC.
Ai ka vlerësuar përpjekjet e presidentit turk, Rexhep Tajip Erdogan, i cili mban një marrëdhënie të ngushtë pune me Putinin, për “përpjekjet e mundshme” për të lehtësuar dialogun midis Rusisë dhe Ukrainës.