Ish-zëvendëskryeminstri i Kosovës, Dardan Gashi ka thënë se kryeministri i Kosovës, Albin Kurti ka ofenduar Republikën e Shqipërisë duke tentuar që t’i instalojë partitë politike atje, një gjë që s’kishte ndodhur kurrë më parë nga asnjëra palë, as nga Kosova, as nga Shqipëria.
Ndërsa, sipas tij, “Albin Kurti veprimin e parë që e kishte bërë ishte që të shkonte të merrte pjesë në zgjedhjet e shtetit shqiptar duke u përzier në politikën e brendshme të Shqipërisë”.
Tutje, ai ka thënë se është prishur një traditë 30-vjeçare që ekzistonte mes Kosovës dhe Shqipërisë, që njëra-tjetrës mos t’i përzihen në punët e brendshme, por vetëm të kritikojnë nganjëherë nga larg.
Ministri i Bujqësisë, Faton Peci e ka pyetur se “a ka të drejtë Albin Kurti si nënshtetas i Shqipërisë të marrë pjesë në cilësinë e një qytetari në zgjedhje”?
Ndërkohë i është kundërpërgjigjur analisti Visar Ymeri, duke thënë se “disa gjëra private suspendohen kur merr përgjegjësi shtetërore siç është pozita e kryeministrit”.
Sipas Ymerit, kryeministri i Kosovës nuk duhet të ndërhyjë në punët e brendshme të një shteti tjetër.