Gjiganti rus energjetik Gazprom (GAZP.MM) rifilloi eksportet e gazit drejt Italisë nëpërmjet Austrisë të mërkurën, pasi zgjidhi një çështje mbi garancitë që kishin çuar në pezullimin e flukseve gjatë fundjavës.
Gazprom tha se kompania dhe klientët e saj italianë kishin gjetur një zgjidhje pas ndryshimeve rregullatore në Austri, të cilat ndaluan flukset që hynin në Itali nëpërmjet një tubacioni që kalonte përmes Tarvisio në verilindje të vendit.
Grupi italian i energjisë Eni konfirmoi në një deklaratë në platformën italiane GME se furnizimet kishin rifilluar megjithëse tha se priste vetëm një pjesë e gazit të kërkuar të mbërrinte të mërkurën.
“Rifillimi i furnizimeve u bë i mundur nga zgjidhja, nga Eni dhe palët e përfshira, e kufizimeve që rrjedhin nga legjislacioni i ri i prezantuar nga autoritetet rregullatore austriake”, tha kompania italiane në një deklaratë të veçantë në faqen e saj të internetit, njofton Reuters.
Ndërsa, nuk u dhanë informacione të mëtutjshme rreth këtij.
CEO i Eni, Claudio Descalzi tha të hënën se pezullimi i flukseve nuk ishte për shkak të “faktorëve gjeopolitikë”.
“Kjo është për faktin se Gazprom do të duhet të paguajë një garanci monetare për transportin e gazit nga Austria në Itali që nuk ishte atje më parë,” tha ai, duke shtuar se garancia arrinte në 20 milionë euro (19.6 milionë dollarë).
Moska dhe disa vende evropiane, përfshirë Gjermaninë, kanë qenë në mosmarrëveshje për furnizimin me gaz natyror nga Rusia që nga pushtimi i vendit në Ukrainë në shkurt.