Ministrja e Punëve të Jashtme të Kosovës, Donika Gërvalla, ka kërkuar kthimin sa më të shpejtë të trupit të Faton Hajrizit, i cili u vra nga policia serbe.
Gërvalla theksoi se të gjitha çështjet lidhur me këtë rast janë adresuar te partnerët ndërkombëtarë.
“Kemi adresuar të gjitha temat edhe tek partnerët ndërkombëtarë sepse së paku trupi i qytetarit tonë do të duhej të kthehej sa më shpejt në Kosovë, do të duhej t’i kthehej familjes”, ka thënë Gërvalla për KlanKosovën.
Ajo shtoi se Zyra Ndërlidhëse e Kosovës në Beograd ka kontaktuar institucionet serbe për të siguruar kthimin e trupit dhe se sapo të ketë informacione të sakta, ato do të ndahen me publikun.
“Kemi vështirësi me fqinjët tanë veriorë, të cilët rrallëherë sillen sipas standardeve të njohura ndërkombëtare”, ka shtuar ajo.
Hajrizi u vra nga policia serbe pasi dyshohet se mesnatën e së mërkurës vrau një polic serb dhe plagosi një tjetër në Lloznicë. Ai ishte arratisur javë më parë nga burgu i Smrekonicës.