Ministrja e Punëve të Jashtme dhe Diasporës (MPJD), Donika Gërvalla, fillon vizitën zyrtare në Monako, në fokus anëtarësimi në organizata ndërkombëtare.
Sipas njoftimit, gjatë vizitës dyditore, Gërvalla do të zhvillojë takime me krerët e institucioneve më të larta shtetërore të Principatës së Monakos.
“Ministrja Gërvalla do të pritet në takim nga ministrja e Punëve të Jashtme, znj. Isabelle Berro-Amadeï, kryetari i Komisionit për Punë të Jashtme, z. Fabrice Notari dhe përfaqësues të tjerë. Vizita e Ministres Gërvalla në Monako është një mundësi e mirë e zhvillimit dhe fuqizimit të raporteve diplomatike dhe ekonomike mes dy vendeve”, thuhet në njoftim.
Tutje, në njoftim thuhet se “Principata e Monakos ka mbështetur Kosovën në fushën e telekomunikimit, duke i mundësuar përdorimin e kodit telefonik, asistencë në instalimin dhe funksionalizimin e telefonisë mobile në Kosovë, në procesin e deritanishëm të anëtarësimit në Këshillin e Evropës, anëtarësimin në Organizatën Ndërkombëtare të Frankofonisë, mbështetje në fushatën e Kosovës për organizimin e Lojërave Mesdhetare ‘Prishtina 2030’, anëtarësimin në Kartën Rinore Evropiane – EYCA etj”.